СҚО-да екі жаңа мектеп пайдалануға берілді

Жаңа оқу жылы қарсаңында облыста 2 жаңа мектеп ашылды. Бұл туралы өңір жетекшісі Айдарбек Сапаров өзінің телеграм каналында жариялады. Екеуі де Тайынша ауданында орналасқан.

Алғашқысы  аудан орталығы Тайынша қаласында. Ол  600 орынға арналған.  Ескі ғимарат апатты жағдайда болған еді. Енді  аудан орталығының балалары кең әрі жайлы мектепте білім алатын болады.

Сондай-ақ бүгін Вишневка ауылының тұрғындары үшін де көптен күткен оқиға. Елді мекенде  120 орынға шақталған жаңа мектептің құрылысы аяқталды. Заманауи мектепте ауыл балалары мен ұстаздарға барынша жағдай жасалған.

Жаңа білім ошақтарының ашылуы облыстағы апатты мектептердің санын қысқартуға мүмкіндік берді. Драгомировка ауылында апатты мектептің орнына жаңа ғимарат тұрғызылады.

Петропавлда алдағы уақытта 3.7 мың орындық 7 мектеп салынады. Оның ішінде 4 мектеп «Жайлы мектеп» ұлттық жобасы аясында жүзеге асырылатын болады.