СҚО-да есірткі сатты деген күдікпен 22 жастағы нашақор ұсталды

СҚО-да 22 жастағы нашақор есірткі сатты деген күдікпен ұсталды, деп хабарлайды тілшіміз.

СҚО ПД есірткі қылмысына қарсы іс-қимыл басқармасының қызметкерлері Петропавл қаласындағы Брусиловский көшесінде 22 жастағы азаматты  ұстады. Жас жігіт нашақор ретінде есепте тұрғандығы белгілі болды. Ол есірткі жасыру арқылы синтетикалық психотроптық заттарды таратты деген күдікке ілінді. Ұстаған сәтте одан ішінде кесектелген зат бар 4 полимерлік түйіншек тәркіленді. Тағы 5 түйіншек оқиға орнын тексеру кезінде табылды. Сараптама нәтижесі α-PvP синтетикалық есірткісі екенін көрсетті. Тәркіленгеннің жалпы салмағы 9 грамды құрады. Бұл аса ірі мөлшерге жатады. Аталған факті ҚР Қылмыстық кодексінің 297-бабының 3-бөлігі бойынша сотқа дейінгі тергеп-тексерулердің бірыңғай тізіліміне тіркелді.

«Ұсталғанның өзі есірткіге тәуелді. Жедел ақпаратқа сәйкес, ол есірткі сатумен айналысатын интернет-дүкендердің біріне жұмыс істеген, есірткі жасырған. Қазіргі уақытта нашақорлыққа және есірткі бизнесіне қарсы күрестің 2023-2025 жылдарға арналған кешенді жоспары шеңберінде есірткі таратушылардың әрекетінің жолын кесу бойынша күшейтілген жұмыс жүргізіліп жатыр. 8 айдың қорытындысы бойынша есірткі өткізуді анықтау көрсеткіші артты. Мәселен өткен жылдың осы кезеңінде 49 факті болса, биыл 71 факті анықталды. Өсім 44,9%  құрады. Жастар арасында нашақорлықтың алдын алу бойынша жұмыстар жүргізіліп жатыр. Заңсыз айналымнан 700 келіден астам есірткі алынды, – дейді СҚО ПД ЕҚҚІҚБ бастығы Иван Терзиди.