Петропавлда 9 адамды үсік шалды

Петропавл қаласында өткен аптада 9 адамды үсік шалды. Олардың төртеуі қазір ауруханада ем қабылдап жатыр, деп хабарлайды тілшіміз. 

Еліміздің бірқатар өңірінде аяз күшейді. Солтүстік Қазақстан облысында ауа тепературасы -40 градусқа дейін төмендеді. Осыған байланысты білім ошақтарында оқу онлайн форматқа ауыстырылды. Дегенменде үсік шалғандар да бар. Бұл ретте жауапты сала мамандары сақ болу керектігін ескертеді.

«Көмекке жүгінгендердің дені – далада жұмыс істейтіндер. Олар аязда аяқ-қолдарын үсітіп алып жатады. Қазір төрт азамат  ауруханада ем қабылдап жатыр.  Ал қалған бесеуі үйінде емделеді. Бақайлар аяқ-киімнің  басына тиіп тұрса, аяқ тез тоңып, үсік шалу қаупі артады.  Сондықтан су өткізбейтін, табаны қалың аяқ киім киген абзал. Аязда темір, күміс, алтын әшекейлер тақпаған дұрыс. Құлақ пен бетіңізді міндетті түрде жауып жүріңіз. Мұрын тез тоңып, үсіп кетуі мүмкін, – дейді көп бейінді қалалық жедел медициналық жәрдем ауруханасы травмотология орталығының меңгерушісі Валерий Грибашов.