Қатты аяз: СҚО-да сабақтар онлайн форматқа ауыстырылды

Облыста  қатты аязға байланысты сабақтар қашықтан оқу форматына ауыстырылды, деп хабарлайды тілшіміз.

Суық солтүстік –батыс  антициклонының енуімен байланысты аймақта аяқды күндер сақталады.

Өңірде өткен түннен бастап ауа райы күрт өзгерді. Қазір ауа температурасы 30 градусқа дейін төмендеп кетті. Осыған байланысты  0-11 сынып оқушылары сабақты онлайн форматта өтеді.

Синоптиктердің болжауы бойынша, сақылдаған сары аяз бірнеше тәулікке созылады. «Қазгидромет» РМҚ бөлімшесінің ақпаратына сүйенсек, бүгін, 7 желтоқсанда қар жауып, жаяу бұрқасын болады. Солтүстік-батыстан соққан желдің жылдамдығы секундына 9-14 метрге жетуі мүмкін. Ауа температурасы түнде және күндіз 27-32 градус аяз болып, ары қарай төмендей береді.

Ал ертең, 8 желтоқсанда, күн ашық болады. Солтүстіктен, солтүстік-батыстан соққан жел екпіні секундына 3-8 метрге жетеді. Термометр бағаны түнде 33-38 градусқа, солтүстігінде минус 41 градусқа дейін төмендейді, күндіз минус 28-33 аралығында болады.

9 желтоқсанда облыстың солтүстік өңірлерінде қар жауып, жаяу бұрқасын болады. Түнде ауа температурасы 33-38 градус аяз, солтүстігінде минус 41, күндіз 26-31 градус аяз болады.