Солтүстік Қазақстанда қаржы пирамидалар бойынша сотқа дейінгі тергеу жүріп жатыр
Солтүстік Қазақстанда «Chia Tai-Tianqing Pharmaceutical» және «Qnet» қаржы пирамидаларынан 100 адам зардап шекті, деп хабарлайды тілшіміз.
Экономикалық тергеу департаменті мамандарының мәліметінше биыл Hermes Ltd қаржы пирамидасының құрылымдық бөлімшесі бойынша материал жинап, сот үкімі шықты. 15 адам зардап шеккен, олар 15 млн 600 мың теңге салған.
Ал қазір «Chia Tai-Tianqing Pharmaceutical» қаржы пирамидасын құру және басқару фактісі бойынша сотқа дейінгі тергеу жүріп жатыр. Бұл ұйым биылғы қаңтар мен сәуір аралығында ел аумағында жұмыс істеген. «Сhia Tai-Tianqing» инвестициялық компаниясының ұйымдастырушылары әлеуметтік желі арқылы салымшы тартып отырған. Сотқа дейінгі тергеп-тексеру барысында СҚО аумағында бұл қаржы пирамидасына 27 адамның жалпы саны 22 млн 700 мың теңгеден астам ақша салғандығы анықталды. Сондай-ақ «Qnet» қаржы пирамидасының өңірлік бөлімшесі бойынша қылмыстық іс тергеліп жатыр.
СҚО тұрғындары «Qnet» компаниясының тәуелсіз өкілі ретінде тіркелу және саяхатшы картасын сатып алу үшін 600-ден 800 мың теңгеге дейінгі мөлшерде, сондай-ақ кеңсені жалға алу үшін 40 мың теңгеден жарна төлеуге тиіс болған. Алаяқтарға 73 адам 82 млн теңге ақшаны беріп қойған.