Алаяқтар полиция департаментінің бастығын алдамақ болған
Солтүстік Қазақстан облысында алаяқтар полиция департаментінің бастығын алдамақ болған, деп хабарлайды тілшіміз.
Өңірдің бас полицейіне хабарласқан пысықайлар одан 30 миллион теңге талап еткен. Әйтпеген жағдайда жұбайы істі болатынын айтқан.
Облыстық қоғамдық кеңестің кезекті отырысында есеп берген Айдын Қабдұлдинов соңғы кездері әсіресе интернет-алаяқтардың арбауына түсіп жатқан азаматтардың саны артқанын айтты.
«Алаяқтар хабарласып, менің жұбайым көлікпен баланы соғып кеткенін айтты. Артынша мәселені шешу үшін олар менен 30 миллион теңге талап етті. Ақшаны алып кету үшін мекенжайымды сұрады. Ал мен облыстық полиция департаментінің мекенжайын айттым», — деді СҚО ПД бастығы Айдын Қабдұлдинов.
Жалпы өңірде жасалатын қылмыстардың 27% алаяқтыққа қатысты екен. Биыл 11 айдың ішінде 940 осындай факті тіркелген. Келтірілген шығын – 800 млн теңгені құрайды.