Жерлесіміз Нұрқожа Қайпанов әлем чемпионы атанды
Солтүстікқазақстандық балуан Нұрқожа Қайпанов еркін күрестен әлем чемпионы атанды. Спортшыны әлем біріншілігіндегі жеңісімен СҚО әкімі Ғауез Нұрмұхамбетов құттықтады.
— Нұрқожа қазақ тарихында Ризабек Айтмұқаннан кейін әлем чемпионы атанған екінші спортшы. Қайпановтың қайсарлығы, қажырлы еңбегі және асқан шеберлігі спорт сүйер қауымды ерекше қуантты. Солтүстік Қазақстанның мақтанышы барша қазақстандықтарға үлгі болдыңыз. Бұл жеңісіңіз жас спортшыларға шабыт беріп, ел абыройын әлемдік деңгейде асқақтатты. Алдағы уақытта да жаңа жетістіктерге жетіп, жеңіс тұғырынан көріне беріңіз! — деп жазды облыс әкімі әлеуметтік желіде.
Айта кеткен жөн, Албания астанасы Тирана қаласында олимпиадалық емес салмақтарда еркін күрестен өтіп жатқан әлем чемпионатында Нұрқожа Қайпанов жеңімпаз атанды.
Бұған дейін 2019 жылы Астанада өткен әлем біріншілігінде күміс алған 70 келіге дейінгі салмақтағы қазақстандық балуан финалда жапониялық Йошиносуке Аоягимен сынға түсті.
Бірінші кезең 1:0 есебімен жапониялық спортшының пайдасына аяқталды. Екінші кезеңде Нұрқожа 3:1 есебімен алға шықты. Қорытынды есеп – 5:3, Нұрқожа Қайпановтың пайдасында.
Осылайша, Н.Қайпанов Ризабек Айтмұқанның өткен жылғы жетістігін қайталады.