Тамызда СҚО-да мал санағы өткізіледі
Биыл ауыл шаруашылығы санағы өтеді. Осы жылы бұл шара тамызда өтеді деп жоспарланған. Осыған орай Солтүстік Қазақстан облысында дайындық жұмыстары басталып кетті. Санаққа заңды тұлғалар, шаруа және фермер қожалықтары, сондай-ақ үй шаруашылықтары қатысады.
Солтүстік Қазақстанда ауыл шаруашылығы саласындағы санаққа дайындық осыдан 1,5 жыл бұрын басталып, арнайы комиссия құрылған. Нақты санақ тамыздың бірінде басталып, 20-шы қазанға дейін созылатын болады.
— Санақ электронды форматта өткізіледі. Sanaq.gov.kz. сайтында онлайн сауалнама жүргізіледі. Сайт танысу үшін іске қосылған. Тұрғындар өздері санақ парақтарын толтыра алады. Сауалнаманы толтыру үшін ЭЦП, QR-код немесе СМС хабарлама арқылы тіркелу керек. Сұрақтары бар парақшаның кей жолдары толтырылған болуы мүмкін. Бұл мемлекеттік орган базаларында бар мәліметтер», — деді өңірлік коммуникациялар қызметінде өткен брифингте СҚО статистика департаментінің басшысы Жорабек Дәуренов.