Өзгенің көлігін айдап кеткен күдікті ұсталды
Есіл ауданына қарасты Покровка ауылының тұрғыны «Priora» автокөлігінің жоғалғанын байқап, бірден полицияға жүгінді. Көп ұзамай оның телефонына жол ережесін бұзғаны туралы хабарлама келіп түсті.
СҚО ПД мәліметінше, оқиға шамамен сағат 05:00-де орын алды. Ұрланған көлік иесінің телефонына Покровка көпірінде жылдамдықты асырғаны туралы хабарлама келіп түсті. Бейнекамерадағы жазба арқылы тәртіп сақшылары ұрланған көліктің бағытын анықтап, оның жолын кесу үшін бағыт бойындағы барлық аудандық полиция бөлімшесіне жедел бағдар жолдады.
Жамбыл ауданында да тосқауыл бекеттері қойылды. Нәтижесінде жүргізуші Приишимка – Архангелка тасжолында тоқтатылды. Рөлде масаң күйде болған Покровка ауылының 32 жастағы тұрғыны екені анықталды. Ол Есіл ауданы полиция бөлімінің жедел тергеу тобына тапсырылды. Аталған факті бойынша қылмыстық іс қозғалды.
Жамбыл ауданы полицейлерінің кәсіби іс-әрекеттері нәтижесінде қайғылы жағдайдың алдын алу мүмкін болды: мас жүргізуші тек өзі ғана зардап шекпей, қала сыртындағы тасжолда өзге де жол қозғалысына қатысушыларға қауіп төндіруі мүмкін еді.