Жетісу өңірінде тойға барған 20 адам астан уланып қалды

Жетісу облысына қарасты Қабанбай ауылында өткен тойда 20 адам уланып қалды, деп хабарлады Жетісу облысының санитариялық-эпидемиологиялық бақылау департаменті.

28 тамыз күні Алакөл аудандық санитариялық-эпидемиологиялық бақылау басқармасына аудандық ауруханадан хабар келіп түскен.

Онда «инфекциялық шығу тегі өзге және анықталмаған гастроэнтерит және колит» алдын ала диагнозы қойылған 20 адамның ауруханаға түскені айтылған.

Алакөл орталық аудандық ауруханасында зардап шеккен барлық адамға алғашқы медициналық көмек көрсетілді. Оның 11-і жұқпалы аурулар бөліміне жатқызылды, қалған 9-ы ауруханаға жатудан бас тартты. Науқастардың жағдайы бірқалыпты, — деп жазылған хабарламада.

Басқарма адамдар уланған мейрамханада эпидемиологиялық тергеу басталғанын жеткізді.Кінәлілер анықталатын болады.

«Тергеу барысында 27 тамызда Қабанбай ауылындағы «Шағала» мейрамханасында өткен үйлену тойында дайын тағамдарды тұтынған адамдардың уланғаны анықталды. Облыстық және аудандық мүдделі органдарға хат жолданды», — деп жазылған хабарламада.