Бескөлдегі «Парасат» мектеп-лицейінде робототехника кабинеті ашылды

Қызылжар ауданының орталығы Бескөл ауылында орналасқан «Парасат» мектеп-лицейінде STEМ зертхана ашылды. Онда оқушылар инженерия саласымен танысып, робот құрастырудың қыр-сырын үйренетін болады, деп хабарлайды тілшіміз.  

Зертхана толықтай заманауи технологиялармен жабдықталған, арнайы көзілдіріктер, конструктор мен роботтар тапсырыспен алынған.  Заманауи кабинетті жабдықтауға жұмсалған 21 миллион теңге –  «Үздік білім беру ұйымы» байқауында жеңімпаз атанған үшін бөлінген қаражат.

Қазіргі таңда оқушылар сабақтан тыс уақытта зертханаға келіп,  қабілеттерін ұштап, білімдерін жетілдіріп жүр.  «Парасат» мектеп-лицейінің информатика пәні мұғалімі  Жандос Манқошевтың айтуынша,  жаңа технологияларды игеруге икемі бар балалардың қатары күн санап артып келе жатыр.

«Зертханада бастауыш сынып оқушылары да оқиды. Олар үшін «Қызықты математика», «Физика әлемі» деген сабақтар бар. Кабинетті жабдықтау мақсатында жаңа жиһаз, стендтар  алынды. Үлкен интерпанель бар.  Алдағы уақытта 3D принтермен де жұмыс  істейтін боламыз», – дейді Жандос Манқошев.

Парасат» мектеп-лицейінің 6 сынып оқушысы Темірхан сыныптасымен бірігіп робот құрастырғанды  ұнататынын айтты.  Олар  түрлі роботтарды құрастырып, қолдары жаттыққан кезде  жарыстарға қатысуды жоспарлап  жүр.

Робототехника негізгі сабақ кестесіне енгізілмеген. Балалар бұл кабинетке арнайы кесте бойынша келеді.