СҚО-да үздік жедел уәкіл анықталды
Солтүстік Қазақстан облысында үздік жедел уәкіл анықталды. Байқауға өңірден 20 полиция офицері қатысты. Әр қызметтен үздік деген қызметкерлер іріктеліп алынды, деп хабарлайды тілшіміз.
Кәсіби байқауда қызметкерлер заңнама мен ведомстволық бұйрықтарды білу жағынан арнайы тестілеуден өтті, атыс және дене шынықтыру дайындығынан сынақ тапсырды. Сондай-ақ офицерлер жауынгерлік күрес тәсілдерін қаншалықты меңгергенін көрсетті. Барлық кезеңдердің қорытындысы бойынша СҚО полиция департаменті есірткі қылмысына қарсы іс-қимыл басқармасының аға жедел уәкілі, 35 жастағы Қуандық Қапаров үздік деп танылды.
Қуандық Қапаров екі жоғары білімі бар. Қазақстан Республикасының Қарулы Күштер қатарында мерзімді әскери борышын өтеген. Ішкі істер органдарында 2011 жылдан бастап қызмет атқарып келеді. Қалалық және облыстық криминалдық полиция бөліністерінде еңбек еткен. Тәжірибесі мол. Туған өлкесі Тимирязев ауданының полиция бөліміндегі криминалдық полиция бөлімшесінің бастығы болған.
2023 жылдан бастап есірткі қылмысына қарсы іс-қимыл басқармасының аға жедел уәкілі лауазымында. Әріптестері мен басшылығы полицей жайлы оң пікірде. Бос уақытында кітап оқып, білімін арттырып отырады, спортпен айналысады.