Солтүстік Қазақстанда мал ұрлаудың 15 жағдайы тіркелді

Жыл басынан бері өңірде мал ұрлығының 15 фактісі тіркелді. Ал оларды бағу ережелерін бұзғаны үшін 2243 солтүстікқазақстандық әкімшілік жауапкершілікке тартылды, деп хабарлайды  тілшіміз.

2019 жылы мал ұрлығына қарсы күресті күшейту мақсатында заңнамаға өзгерістер енгізілді. ҚР Қылмыстық кодексі 188-1 «Мал ұрлау» бабы толықтырылып, жауапкершілік қатаңдады. Осылайша, бірнеше мәрте мал ұрлау ауыр қылмыс санатына жатқызылып, татуласу мүмкіндігі алынып тасталды. Сонымен қатар малдың еркін жайылымы үшін де иелеріне әкімшілік жауапкершілік енгізілді. Өйткені, кейде қараусыз қалған мал жол үстіне шығып кетіп, жол-көлік оқиғасына себеп болып жатады. Жергілікті полиция қызметінің ақпаратына сәйкес, жыл басынан облыстағы 230 арнайы қамау орындарына 8225  мал қамалған. Малдарды бағу ережелерін бұзғаны үшін 2243 солтүстікқазақстандық әкімшілік жауапкершілікке тартылған. СҚО ПД тергеу басқармасының мәліметінше, облыста 8 айдың ішінде 15 мал ұрлығы тіркелді. Оның екеуі мал еркін жайылып жүрген уақытта жасалған. Басқа фактілерде тұяқтылар қамаулы тұрған жерінен ұрланған.

«Қора-қопсыны мықтылап жасау мал ұрлығының алдын алуда жақсы көмек. Облыс тұрғындарын төрт түлікті бағып-қағуға жауапкершілікпен қарауға, оларды қаскөйлердің әрекеттерінен барынша қорғауға шақырамыз. Қылмыс тіркелген жағдайда бірден полицияға хабарласу қажет. Өйткені қылмысты ізін суытпай ашуға болады»,-дейді СҚО ПД тергеу басқармасының бастығы Қайрат Қасымбеков.