Петропавлда газ тасымалдайтын көлік өртенді (Видео)

Петропавлда жанар – жағармай құю бекетінде өрт болды. Тілсіз жау станцияға газ әкелген жүк көлігінен шыққан, деп хабарлайды тілшіміз.

Лезде лап берген оттан жүргізуші зардап шекті. Денесін күйік шалған ер адам шұғыл түрде ауруханаға жеткізілді. Дәрігерлердің айтуынша, оның жағдайы ауыр. Ал, оқиға орнына келген құтқарушылар газ құбырын өшіріп, жойқын жарылыстың бетін қайтарды.

Қазір болған жағдайдың себеп – салдары анықталып, шығын көлемі есептеліп жатыр. Болжам бойынша, өрт техникалық қауіпсіздік ережесінің сақталмауынан тұтанған. Қазір тергеу амалдары басталды.

«11:20 минут кеткенде бізге қоңырау түсті. Оқиға орнына 2 минутта 9 техника мен 43 өрт сөндуруші келді. Олар оттың жайылып кетпеуіне жағдай жасады. Және жедел жәрдем мамандары мен полиция қызметкерлері де жұмылдырылды. Өрттің шығу себебі анықталып жатыр» ,- деді СҚО ТЖД бастығы Ерік Сарыбаев