«Менің елім – менің туым» челленджіне Петропавл қаласының жастары да үн қосты

Республика күні қарсаңында «Жастар Рухы» жастар қанаты мен жастар ресурстық орталығының белсенділері Петропавлдағы 18 қабатты үйге ту ілді, деп хабарлайды тілшіміз.

Облыс орталығындағы Жамбыл Жабаев көшесіндегі үй тұрғындары арасында патриотизмді дамыту мақсатында мемлекеттік тумен безендірілді. Ұйымдастырушылар атап өткендей, бұл қала тұрғындарының бойында бірлік, ұлттық мұра мен мемлекеттік рәміздерге деген сүйіспеншілік пен құрмет сезімін оятады. 

«Ұлттық бірегейлік пен елімізге деген сүйіспеншілік қазақстандықтардың жүрегінде ерекше орын алады. Осы үйге жалаушаларды ілу арқылы біз алдағы Республика күнінің маңыздылығын еске саламыз. Патриоттық тәрбие елдің болашағын қалыптастыруда маңызды рөл атқарады. Біз Қазақстанның дамуы мен ілгерілеуіне белсенді ықпал ететін жауапты  азаматтардың ұрпағын құруға ұмтыламыз», — деді «Жастар Рухы» ЖҚ СҚОФ төрағасы Біржан Құдайбергенов.

Челлендж өтіп бара жатқан адамдар мен аудан тұрғындарының назарын аударды. Көбісі жас белсенділердің патриотизмді дамытуға және бірлік сезімін нығайтуға деген ұмтылысына таңданыс білдірді.

«Республика күні және бұл акция бәрімізге елдің терең тарихын, мәдени байлығын және азаматтардың ел құндылықтарын қорғауға деген  жауапкершілігін еске салады», — деп атап өтті Петропавл тұрғындарының бірі.