Петропавлда жаңадан бой көтерген емхана пайдалануға берілді

Республика күні қарсаңында Петропавлда жаңа емхана пайдалануға берілді. «Жас өркен» ықшам ауданында орналасқан медициналық мекеме №1-ші қалалық емхананың жаңа филиалы болады. Енді емдеу мекемесі 34 мыңға жуық өңір тұрғынын қабылдайтын болады, деп хабарлайды тілшіміз.

№ 1-ші қалалық емханада бүгінгі күні 66 мыңға жуық азамат тіркелген. Салдарынан басы ауырып, балтыры сыздағандар ұзын-сонар кезек күтуге мәжбүр болған еді. Ал жаңадан ашылған нысан аталған мәселені шешуге ықпал етеді.

«Жас өркен» ықшам ауданы қаламыздағы жаңа әрі әлеуеті жоғары аудандардың бірі. Бірнеше жылда бұл жерде көптеген көпқабатты тұрғын үйлер мен әлеуметтік, мәдени, спорттық  нысандар бой  көтеруде. Бүгін ашылып отырған емхана филилалы да енді тұрғындар игілігі үшін жұмыс істейтін болады», – деді емхананың ашылу салтанатына қатысқан Петропавл қаласының әкімі Серік Мұхамедиев.

№ 1-ші қалалық емхананың жаңа филиалында барлық диагностикалық қызмет түрлері қолжетімді болмақ. Мұнда замануи талаптарға сай келетін рентген, флюорография, эндоскопиялық кабинет, функционалдық диагностика аппараттары бар. Емхана директорының сөзінше, енді өңір тұрғындарының арасында холтер қызметіне де кезек екі есеге азаймақ.

«Кейбір дәрігерлер жаңа емханада қабылдау жүргізеді. Және олардан басқа 57-ге жуық қызметкерді жұмысқа алатын боламыз. Ескі ғимараттың дәліздері, кабинеттері бәрі тар еді. Өте ыңғайсыз болған. Жаңа емханада барлық кемшіліктер ескеріліп, жаңаша салынған. Эхокардиография,  холтерға бізде кезек өте көп болатын. Әрі тұрғындар кезегін ұзақ уақыт күтетін. Бұл мәселе енді ешімін таппақ», – дейді № 1 қалалық емхананың директоры Николай Новиков

Емхана ресми түрде ашылғанымен, тұрғындарды қабылдау желтоқсан айының соңында басталады.  Жаңа нысанда интернет желісін тарту жұмысы жүргізіліп жатыр.