СҚО-да элеватор өртеніп, 100 тоннадан астам астық бүлінді

Солтүстік Қазақстан облысында элеватор өртеніп, 100 тоннадан астам астыұ жанып кетті, деп хабарлайды тілшіміз.  

Оқыс оқиға Ғабит Мүсірепов атындағы ауданында болған. «Ақ нан север» ЖШС-нің элеваторында өрт шыққан.

25 қазан күні түнгі сағат бір кезінде от шыққан. Қызыл жалынды ауыздықтауға № 16 өрт сөндіру бөлімінің 21 қызметкері мен 4 бірлік техникасы, сондай-ақ «ҚТЖ» АҚ пойызы жұмылдырылған.

«Өрт 274 шаршы метр аумақты шарпыған. Салдарынан 100 тонна күнбағыс дәні мен астық кептіргіш жанып кетті.  Сондай-ақ қызыл жалын жақын маңда орналасқан қазандыққа ауысып, шатырын зақымдаған. Абырой болғанда зардап шеккендер мен  адам шығыны жоқ. Өрт таңғы сағат 07:19-да ауыздықталды. Қызыл жалынмен күресуге қатты жел кедергі келтірді. Алдын ала болжам бойынша от технологиялық процестердің бұзылуынан шыққан», – деп хабарлайды СҚО ТЖД баспасөз қызметі.

Қазіргі таңда келтірілген шығын мен өрттің неден шыққандығы анықталып жатыр.