Жақсылық жасап жарысқан жандар….

Манаш Қозыбаев атындағы Солтүстік Қазақстан университетінің оқытушысы Айгүл Айтымова  «Qamqor team» еріктілер қозғалысын құрып, көмекке мұқтаж жандарға қол ұшын созады. Олардың қайырымдылық жасап жүргендеріне төрт жыл болған, деп хабарлайды  тілшіміз. 

Бүгінде аталған еріктілер қозғалысының 40-тан астам мүшесі бар. «QAMQOR_TEAM» еріктілер қозғалысы «аманаттықтармен» бірге аз қамтылған, көп балалы және толық емес отбасыларға көмектеседі. Сондай-ақ, мектеп оқушыларымен, балалар үйінің тәрбиеленушілермен бірлесіп, қайырымдылық шараларын ұйымдастырады. Азық-түлікке, кеңсе тауарларына мұқтаж отбасыларға  жәрдемдеседі.

 «Қаражатты өзіміз жинаймыз. Тұрақты демеушілерімізе бар. Бізді жақындарымыз да қолдайды. Көп жағдайда қарапайым адамдар хабарласып, көмекке мұқтаж жандардың телефон нөмірін сұрап, көмектесіп жатады», – деді Манаш Қозыбаев атындағы Солтүстік Қазақстан университетінің аға оқытушысы Айгүл Айтымова.

Соңғы төрт жыл бойы «QAMQOR_TEAM» еріктілер қозғалысы «Аяла» қарттар үйіне, «Аналар үйі» ресурстық орталығына, отбасылық үлгідегі балалар үйіне, мүгедек балалардың аналар ұйымына үнемі көмектесіп, қайырымдылық шараларын өткізеді. Сондай-ақ, қозғалыс мүшелері ауыр сырқаттары бар балаларға  қаражат жинаумен айналысады.

Жақсылып жасап жарысқандардың жұмысын ҚР Еңбек және әлеуметтік қорғау вице-министрі, облыс әкімдігі, түрлі қайырымдылық қорлардың мүшелері жоғары бағалап, алғыс хат табыстаған.Мұнымен қоса  2021 жылы  Айгүл Айтымова Мемлекет басшысы Қасым-Жомарт Тоқаевтың «Халық алғысы» медалімен марапатталды.

Ал қозғалыс мүшелері Алтын Шаяхметова мен Жамиля Тұяқбаева Қазақстанда жыл еріктілері атанды.