СҚО-да көлік салғын төлемей жалтарылып жүрген 4 мыңнан астам адам анықталды

Солтүстік Қазақстан облысында 4 мыңнан астам адамның  көлік салығын төлемей жүргені анықталды. Берешектің жалпы сомасы – 245 миллион  теңгені құрады, деп хабарлайды тілшіміз.

Мемлекеттік кірістер департаменті мамандары өзге де құзырлы мекемелердің қызметкерлері бірлесіп рейдтер өткізіп жатыр. Ондағы мақсат мерзімі биыл сәуір айында аяқталған көлік салығын төлемегендерді анықтау. Көлік құралын иеленудің нақты кезеңі көлік сатып алынған айдың 1-ші күнінен бастап және оны сатқанға дейін есептеледі. Егер төлемеген салығы 1 АЕК-тен асып кетсе, борышкердің ісі сот орындаушысына жіберіледі. Сондай-ақ қарыз сомасы қырық еселенген айлық есептік көрсеткішке тең болса немесе одан асса, борышкерге елден шығуға тыйым салынуы мүмкін.

«2023 жылдың қыркүйек-қараша айлары аралығында 8,5 миллион теңгеден салық берешегі өндіріліп алынды. Қалған борышкерлер де қарызын өтеулері керек. Салық берешегінің бар-жоқтығы туралы ақпаратты Қазақстан Республикасы Қаржы министрлігі Мемлекеттік кірістер комитетінің www.kgd.gov.kz ресми сайтының «электрондық қызметтер» бөлімінде анықтауға болады», – дейді Петропавл қаласының өндірістік емес төлемдер бөлімінің жетекшісі Юрий Белокопытов.