СҚО әкімі жерлестерімізді Наурыз мейрамымен құттықтады
Облыста Наурыз мейрамына арналған мерекелік шаралар өтіп жатыр.
Облыс әкімі Ғауез Нұрмұхамбетов алаңға жиналған қалың қауымды Ұлыстың ұлы күнімен құттықтап, жаңа жылда береке мен бірлік, саулық пен молшылық тіледі. Мейрамға орай басты алаңда тақырыптық киіз үйлер тігіліп, тұрғындар мен қонақтар халқымыздың салт-дәстүрлері мен мәдениеті туралы ақпарат алды.
Өңір басшысы қазақ тілі мен қол өнерге арналған киіз үйлерде болды. Ерекше балалар да өздерінің өнерін көрсетті. Өңірімізге қоныс аударған азаматтар жасаған этноауылда қазақ халқының өмір сүру салты паш етілді. Мерекелік концерт пен ұлттық спорттық ойындар да Наурыздың көркіне айналды.
— Бүгін алаң адамдарға лық толы болды, бұл Наурыздың жалпыұлттық мереке екенінің тағы бір дәлелі, бірлік пен ынтымақтың көрінісі, — деп жазды облыс әкімі әлеуметтік желіде.