Қызылжар ауданында шағын футболға арналған 5 алаң салынады
Биыл Қызылжар ауданында 5 шағын футбол алаңы салынып, Бескөлде жабық хоккей қорабының құрылысы жүргізілмек.
Қызылжар аудандық мәдениет, дене шынықтыру және спорт бөлімінің мәліметінше, өткен жылы Знаменское, Бугровое, Налобино, Пресновка және Бескөл ауылдарында жергілікті бюджеттен бөлінген 73 млн. теңгеге шағын футболға арналған жасанды жамылғысы бар алаңдар тұрғызылды. Сондай-ақ Пеньково, Боголюбово, Виноградовка мен Подгорноеда спорттық алаңқайлар орнатылды. 2025 жылы Бескөлдегі стадионды жаңарту жоспарда бар. Жалпы ауданда 226 спорттық нысан жұмыс істейді.
Бүгіндері аудан тұрғындарының 44 пайызы, яғни 20668 адам тұрақты түрде спортпен шұғылданады. Дегенмен, әлі де кейбір ауылдарда спорттық нысандар жетіспейді. Бұл мәселе аудан әкімінің де назарында.