Петропавлда полицейлерге погон табысталды
Солтүстік Қазақстан облысының полиция департаментінде жас полиция қызметкерлеріне алғашқы офицерлік шендерді табыстау рәсімі өтті.
Әріптестері мен басшылықтың қатысуымен сегіз полиция қызметкері өздерінің алғашқы офицерлік погондарын алды. Оларды СҚО ПД бастығы Айдын Қабдұлдинов табыстады. Айта кетерлігі, олардың жетеуі – қыз-келіншектер, олар тергеу және анықтау бөлімшелерінде қызмет етуді таңдаған. Бұл полиция қызметінің әйелдер арасында да сұранысқа ие болып келе жатқанын көрсетеді. Жас офицерлерге үндеуінде Айдын Қабдұлдинов бұл оқиғаның маңыздылығын атап өтіп, әрбір полиция қызметкерінің жауапкершілігіне назар аударды.
— Сіздер офицерлік погон алып, заң мен тәртіпті қорғаушылар қатарына қосылдыңыздар. Сіздердің адалдықтарыңыз, табандылықтарыңыз және кәсібиліктеріңіз азаматтардың сеніміне тікелей әсер етеді. Бұл сенімді ақтап, қоғамның қауіпсіздігін қамтамасыз ету үшін бар күш-жігерлеріңізді саласыздар деп сенемін, — деді ол.
Сонымен қатар шара барысында тағы жеті полиция қызметкеріне кезекті арнайы шендер берілді: төртеуі – капитан, үшеуі – полиция майоры атанды. Олардың қатарында криминалдық полицияның жедел уәкілдері, жедел басқару орталығының инспекторлары, учаскелік инспекторлар мен патрульдік қызметтің қызметкерлері бар. Олар күн сайын қоғамдық тәртіпті қорғау және қылмысқа қарсы күрес бойынша маңызды миссияны атқарады. Рәсімнен кейін полиция қызметкерлері үлкен мақтанышпен өз қызметтеріне кірісті.
Алынған шен – тек лайықты марапат қана емес, сонымен қатар қоғам алдындағы жаңа деңгейдегі жауапкершілік, өйткені азаматтар өздерінің қауіпсіздігін осы қызметкерлерге сеніп тапсырады.