Жарияланған күні: 26.06.2025
СҚО-да 64 мың га жер мемлекет меншігіне қайтарылады
Жыл басынан бері облыста 143,2 мың гектар болатын жер учаскелері тексерілді. Оның 76,7 мың гектары пайдаланылмай жатқаны анықталды.
Бүгіндері 35,6 мың гектар мемлекет меншігіне қайтарылды, алайда жылдық жоспарды толық орындау үшін тағы 64,4 мың гектарды қайтару қажет. Жер ресурстарын басқару департаментінің басшысы Жалғас Сүлейменовтің айтуынша, жерді мақсатсыз пайдаланушыларға ықпал етудің негізгі тетігі – жер салығының 20 есеге ұлғайтылған мөлшерлемесі.
— 2025 жылы жүргізілген 72 тексерістің қорытындысы бойынша 48 нұсқама берілді. Олар жер телімдерінің құқықтарына шектеу ретінде тіркеліп, 20 есеге арттырылған салық мөлшерлемесін қолдану үшін Мемлекеттік кірістер департаментіне жолданады. 46 әкімшілік жаза қолданылып, оның ішінде 34 айыппұлдың жалпы сомасы 3 млн 534 мың теңгені құрады. 7 шаруашылық нұсқамалардан кейін заңбұзушылықтарды жойды, тағы 4 агроқұрылым 2,6 мың гектар жерден ерікті түрде бас тартты. Жыл соңына дейін 100 мың гектар жерді қайтару жоспары ерікті түрде беру мен сот шешімдері арқылы толық орындалмақ, — деді Жалғас Сүлейменов.
⠀
Назар аударылған негізгі мәселелердің бірі – жұмысы артта қалған аудандар. Мәселен, Уәлиханов ауданында белгіленген 18 мың гектардың тек 10,6%-ы ғана қайтарылған, ал 1,5 мың гектар бойынша құқық тоқтату үдерісі жүріп жатыр. Аудан әкімінің орынбасары Дархан Бейсембиннің айтуынша, жұмыс үш бағытта қатар жүргізілуде: ерікті түрде қайтару, тіркелмеген жер телімдерін анықтау және сот арқылы қайтару. Дегенмен, жер телімдерінің кепілде болуы және кейбір жер пайдаланушылардың облыстан тыс жерде тұруы жұмысты қиындатуда – 19,6 мың гектар жер иесіз мүлік ретінде деп тануға дайындалуда.
⠀
Мәлім болғандай, 2025 жылы мәжбүрлеп қайтару аясында жалпы көлемі 2,6 мың гектар болатын екі талап арыз сотқа жолданған. Соның бірі – 2,4 мың гектар жайылым бойынша іс қанағаттандырылды, екінші іс – 192 гектар жерге қатысты – қаралуда.