Жарияланған күні: 14.04.2026
Петропавлда 7 жасар балаға көмек көрсетілді
Петропавлда 7 жасар балаға шұғыл түрде гастростома орнатылып, оның тұрақты тамақтануын қамтамасыз ететін өмірлік маңызы бар медициналық көмек көрсетілді. Бұл оқиға – үш жылға созылған күрес, күрделі диагноз және үздіксіз шешім іздеудің арқасында уақытылы көрсетілген көмектің нақты көрінісі.
Оқиға үш жыл бұрын басталған. Сол кезде балаға өңештің бітелуі диагнозы қойылған. Алғашында ол Петропавлда дәрігерлердің бақылауында болды, кейін қосымша тексерулер мен ықтимал операция үшін Астанаға жіберілді. Алайда мамандар хирургиялық араласудан бас тартып, баланың тамақтануын қамтамасыз ету мақсатында манжета мен гастростома орнату туралы шешім қабылдады.
Баланың анасы Татьяна Лукьяненконың айтуынша, гастростоманы пайдалану бастапқыда айтарлықтай қиындық туғызбаған. Дегенмен уақыт өте келе оны заманауи, төмен профильді үлгіге ауыстыру қажеттілігі туындаған. Осы проблемамен ол «AMANAT» партиясының Солтүстік Қазақстан облыстық филиалының қоғамдық қабылдауына жүгінді. Мәселені қарау барысында мұндай медициналық бұйымдардың қазіргі таңда мемлекет есебінен қаржыландырылмайтыны анықталды, бұл өз кезегінде отбасыға елеулі қаржылық салмақ түсіреді.
— Біз бұл мәселені зерделеп, аталған бұйымдардың қаржыландырылмайтынын анықтадық. Уақытты жоғалтпау үшін жедел түрде кәсіпкерлерді тарттық. Қажетті құрал сатып алынып, қазірдің өзінде балаға орнатылды, – деді Петропавл қалалық мәслихатының депутаты Елена Семидоцких.
Сонымен қатар, партия өкілдері Қазақстандағы медициналық бұйымдарды жеткізушілермен, соның ішінде «Gelika» ЖШС-мен ынтымақтастық орнатқан. Кездесу барысында гастростомаларды жеткізу, оларды пайдалану ерекшеліктері және жүйелік шектеулер талқыланды.