СҚО Төтенше жағдайлар департаменті мемлекеттік өртті бақылау басқармасының мәліметінше, өңірде кепкен шөптің жану фактілері жиілеп барады. Ақпаратқа сәйкес, наурыздың 25-нен бастап, тұрғындар өз бетінше шөпті күйдіріп жатыр. 

— Тайынша ауданында 14 өрт, Петропавлда 2, Айыртау, М.Жұмабаев және Жамбыл аудандарында бір жағдайдан тіркелді. Жалпы өртенген аумақ 30 га алып жатыр. Тұрғындардың бейғамдығы өрттің шығуына себеп болған. Қазір қыстан қалған қоқысты, кепкен шөпті жинап, күйдіру басталады. Сондықтан қарапайым ережелерді ұмытпау керек. Қалдықтарды ғимараттар мен құрылыстардан 50 метр қашықта жағу керек. Ол үнемі бір адамның бақылауында болғаны жөн, — дейді СҚО ТЖД мемлекеттік өртті бақылау басқармасының басшысы Аслан Ахметжанов.

Қамыс пен құрғақ шөпті шаруашылық және өндірістік қажеттілік болған жайдайда, өрттің пайда болу қаупін азайту мақсатында ғана шабуға болады.

— Шаруашылықтардың басшылары, жеке тұлғалар, кәсіпкерлер мен орман иеленушілер ауыл шаруашылығы және жайылымдық алқаптарда шөптерді, сабанды, сондай-ақ орманды дала алқаптарының аумақтарында ағаш бұтақтарын күйдіруді өрт қауіпті кезең басталғанға дейін немесе аяқталғаннан кейін ғана өрт қауіпсіздігі шараларын сақтап жүргізе алады, — дейді Аслан Ахметжанов.

Қызылжар ауданында мектеп уақытша жабылды