СҚО тұрғындарын сумен қамту жобаларына 74 млрд теңге жұмсалды

Солтүстік Қазақстан облысында 590 ауыл бар, онда өңір халқының жартысына жуығы тұрады. Президент Қасым-Жомарт Тоқаевтың «Қазақстанның жаңа тарихи кезеңдегі өзекті міндеттері» атты Қазақстан халқына Жолдауында өңірлерді дамытуға ерекше көңіл бөлінеді.

Солтүстік Қазақстан облысы үшін бұл мәселе әсіресе өзекті. Ауылдық елді мекендердің едәуір санын және аумақтық бытыраңқылықты ескере отыру керектігі мәлім. 

СҚО экономика басқармасының мәліметінше, өңірде 590 ауыл бар. Оларда облыс халқының жартысы дерлік тұрады.

— «Қазақстан Республикасының ауылдық аумақтарын дамыту тұжырымдамасы» және басқа да мемлекеттік бағдарламалар шеңберінде облыста инженерлік және әлеуметтік инфрақұрылым дамуда. Жолдар мен желілер жөнделіп, әлеуметтік нысандар салынып, ауылдар мен қалалар абаттандырылады, — деп атап өтті басқарма басшысы Қуанышбек Қалижанов.

Биыл «Ауыл — Ел бесігі» жобасы бойынша қаржыландыру көлемі 59,7 млрд теңгені құрады. Оның ішінде 14 ауылды дамытуға 1,8 млрд теңге.

«Ауыл Аманаты» бойынша 8 млрд теңге бөлінді. 3 млрд теңгеге жуық сомаға 283 өтінім келіп түсті. «Дипломмен ауылға» жобасы аясында 548 маманды тарту жоспарланған. Бұл мақсатқа жергілікті бюджеттен 237 млн теңге бөлінді.

Өңірлік стандарттар жүйесі бойынша объектілермен және көрсетілетін қызметтермен қамтамасыз етілу деңгейі 66,1% -ға жетті.

Ауыл тұрғындарын 100% ауыз сумен қамтамасыз ету маңызды нәтиже болды. Өткен жылдың өзінде сумен жабдықтау жобаларын жүзеге асыруға 74 млрд теңгеге жуық қаражат жұмсалды. Ауылдық елді мекендерді абаттандыру жұмыстары жалғасуда.