Петропавлда жеке киноүй ашылуы мүмкін
Петропавлда өз киносын шығарып, қазақстандық режиссерлердің фильмдерін түсіру жоспарланып отыр. Осындай бастаманы креативті орталық өкілдері ұсынып отыр. Осылайша екі жыл ішінде шығармашылық индустрияға солтүстікқазақстандықтар өз үлестерін қоспақ. Жаңа кеңістік 90 резидентті біріктірді, ал өзін-өзі жүзеге асыру мүмкіндіктері ауыл тұрғындарында да пайда болды.
Креативті экономика идеяларды табысты жобаларға айналдыруға дайын адамдар үшін жаңа перспективалар ашады. Осыдан екі жыл бұрын Петропавлда шығармашылық индустрия өкілдерін біріктіретін орталық пайда болды. Бүгінде мұнда 90 резидент жұмыс істейді. Олар өнер, дизайн және медиатехнологиялар салаларын дамытады, сондай-ақ оқыту тренингтері мен шеберлік сыныптарын өткізеді.
— Креативті орталық маған жобаларды жүзеге асыруға көмектеседі. Мен осында оқимын. Басқа резиденттердің жеке кабинеттері бар, біреулер тігумен және басқа да бағыттармен айналысады. Бұл өз идеяларыңызды монетизациялауға мүмкіндік береді, — дейді креативті орталықтың резиденті Василиса Калиниченко.
Шығармашылық стартаптар — бұл өзін-өзі жүзеге асыру ғана емес, өңір экономикасына қосқан үлесі. Жаңа жобалар жұмыс орындарын ашуға, жастар үшін перспективалар ашуға және шағын бизнесті дамытуға мүмкіндік береді. Биыл креативті орталықтың қызметіне 25 миллион теңге қарастырылған.
— Президент Жолдауын жүзеге асыру бойынша біз 100% жұмыс істеудеміз. Бізді барлық жағынан қолдайды. Екі жыл ішінде біз 400-ден астам іс-шара өткіздік, оған түрлі жастағы 25 мыңнан астам адам қатысты. Креативті экономика — бұл тек жастар үшін ғана емес. Онымен он жастағы балалар да, сексен жастағы адамдар да айналыса алады. Оның мәні — шығармашылық дағдыларды монетизациялау, — деп есептейді облыс әкімінің креативті экономиканы дамыту жөніндегі кеңесшісі Закиржан Мамлютов.
Облыс орталығынан тыс жерлерде де шығармашылық әлеуетті дамытуға шешім қабылдадық. Өңірдің барлық аудандарында дерлік креативті IT-орталықтар ашылды, онда ауыл тұрғындары цифрлық технологияларды игеріп, жаңа білім алып, жеке жобаларын дамыта алады.
— Бүгінгі таңда 11 ауданда осындай 15 орталық ашылды. Креативті орталықпен бірлесіп, онда көшпелі іс-шаралар өткіземіз. Осы орталықтардың базасында кемінде 33 іс-шара, сондай-ақ ауыл жастарын қызықтыратын ІТ бағыттары бойынша бірқатар вебинарлар жоспарланған, — деп атап өтті Креативті индустрияларды дамыту қорының өңірлік үйлестірушісі Нұргүл Болатова.
Креативті орталықта киноиндустрия да дамытыла бастады: қазақстандық кино фестивальдары өткізілді, ал жергілікті таланттар Ботай өркениеті туралы фильмнің түсіріліміне қатысты. Бұл оларға баға жетпес практикалық тәжірибе жинақтауға мүмкіндік берді.