Солтүстікқазақстандық кикбоксшы әлем чемпионатынан жүлдемен оралды
Мажарстан астанасы Будапешт қаласында кикбокстан жастар мен жасөспірімдер арасында әлем чемпионаты өтті. Оған дүниежүзінің 53 мемлекетінен 812 кикбоксшы қатысты. Байрақты бәсекеде солтүстікқазақстандық спортшы Владислав Черенщиков жүлдегерлер қатарынан көрінді.
Жерлес кикбоксшы бұл спорт түрімен бес жылдан астам уақыт айналысады. Биыл Владислав алғаш рет дүниежүзілік деңгейдегі жарысқа қатысып, олжалы оралды. Солтүстікқазақстандық былғары қолғап шебері үш кездесу өткізіп, қола жүлдені місе тұтты.
– Мен 57 килограмм салмақ дәрежесінде өнер көрсеттім. Алғашқы жекпе-жекті польшалық спортға қарсы өткіздім. Кейін Мажарстан елінің өкілін қапы қалдырдым. Жартылай финалда украиналық кикбоксшыға есе жіберіп, үшінші орынды иелендім. Бұл жаман нәтиже емес деп ойлаймын. Алдағы уақытта алтынға қол жеткізуге барымды саламын, — дейді Владислав Черенщиков.
Желтоқсан айында Петропавлда ересектер арасында кикбокстан ҚР чемпионаты өтеді. Оған Владислав Черенщиков та қатыспақ.