«Қызылжар» клубы тағы да жеңілді
Футболдан ел біріншілігінің 21-ші турында жергілікті «Қызылжар» клубы сырт алаңда түркістандық «Тұран» командасына қарсы ойын өткізді. Өкінішке қарай, бұл матчта жерлестеріміз қажетті үш ұпайды еншілей алмады.
Ойын басталысымен алаң иелері шабуылдауға кірісті. Көп ұзамай кездесудің 5-ші минутында «Тұран» командасының жартылай қорғаушысы Никола Цуцкич есеп ашты. Бірінші таймда жерлестеріміз таразы басын теңестіруге тырысқанымен, клубтар үзіліске 1:0 есебімен тарқасты.
Кездесудің екінші бөлімінде қызылжарлық ойыншылар қарқындарын үдете түсті. Бірде доп қақпа маңдайшасынан табылса, енді бірде мүлт кетіп жатты. Салдарынан есеп өзгеріссіз қалып, жеңіс «Тұран» клубына бұйырды.
Ел біріншілігіндегі 21-ші турдың қорытындысы бойынша турнирлік кестеде «Елімай» клубы көш бастаса, алматылық «Қайрат» командасы екінші орынға табан тіреді. Жерлестеріміз болса, 19 ұпаймен 10-шы орынды сақтап қалды.