СҚО-да ішкі істер органының бұрынғы қызметкерлері жұртты Qnet қаржы пирамидасына тұрғындарды тартып келген

Солтүстік Қазақстан облысында Qnet қаржы пирамидасын ұйымдастырды деген күдікпен 3 азамат ұсталды. Олар өңірдің 73 тұрғынын сан соқтырып кеткен, деп хабарлайды  тілшіміз.

СҚО бойынша экономикалық тергеу департаменті мамандарының мәліметінше, ұсталған үшеу 2018-2021 жылдар аралығында Qnet қаржы пирамидасын құрып, оған 73 солтүстікқазақстандықты тартқан. Ұйым қызметінен зардап шеккен тұрғындардың шығыны 82 млн теңгені құрады.

«Qnet қаржы пирамидасы Малайзияда тіркелген. Компания халықаралық интернет саудамен айналысады-мыс. Тек оған кіру үшін қомақты қаржы төлеу қажет. Тіркелу құны – 600 мың мен 800 мың теңге аралығында тұрады. Қаржы пирамидасын ұйымдастырушылар кеңсе жалдап сол жерде адамдарға оқыту семинарлары мен дәрістер жүргізген. Яғни, оларды командаға қосылуға үгіттеген», – деп хабарлайды СҚО бойынша экономикалық тергеу департаментінің қызметкерлері.

Қаржы пирамидасын ұйымдастырғандардың арасында бұрынғы ішкі істер органдарының қызметкерлері де болған.

«Қазір қаржы пирамидасын ұйымдастырды деген үш азамат уақытша ұстау изоляторына қамалған. Оларға қатысты ҚР ҚК 217 б. 3 б. (Қаржылық (инвестициялық) пирамиданы құру және оған басшылық ету) бойынша іс қозғалды.  Өзге ақпарат тергеу мүддесі үшін жария етілмейді.  Қазір қаржы пирамидасына тартылып, зардап шеккен тұрғындарды іздестіріліп жатыр. Олар СҚО бойынша экономикалық тергеу департаментіне хабарласа алады», – делінген ақпаратта.