СҚО-да ашытқы шығаратын зауыт салынады

Солтүстік Қазақстан облысында ашытқы шығаратын зауыт салынады, деп хабарлайды тілшіміз.  

Өңір жетекшісі Ғауез Нұрмұхамбетов  италияндық «PROSOL» компаниясының басқарушы директоры Даниэле Бонвичинимен кездесіп, перспективалы инвестжобаны жүзеге асыру жоспарын талқылады. Еуропавдан ат терлетіп келген мейман отандық кәсіпкермен Солтүстік Қазақстанға 1,5 миллиард теңге көлемінде қаржы құймақшы. Мұндай өнім жануарлар мен құстарға және балықтарға биоқосымша ретінде беріледі. Сонымен қатар, құрамажем дайындау кезінде пайдаға жаратылады.

«Әлем бойынша мұндай өндірісті оң жолға қойған 4 қана компания бар. Соның бірі – біздің кәсіпорын. Бізді Солтүстік Қазақстан облысын бекерден-бекер таңдаған жоқпыз. Бұл жерде аграрлық сала жақсы дамыған. Ірі мемлекеттердің ортасында тұр. Саяси жағдай тұрақты. Осы факторларды ескеріп, сіздердің аймаққа келіп отырмыз», — деді “PROSOL SPA” компаниясының басқарушы директоры Даниэле Бонвичини.

Бұл компания қарашада «Qyzyljar» арнайы экономикалық аймағының қатысушысы атанды. Облыс әкімі Ғауез Нұрмұхамбетов өңірдің ауыл шаруашылығы саласындағы мүмкіндіктерін жіпке тізді. Сонымен қатар, инвесторларға жасалатын жағдайды баян етті және тың жобаға қолдау танытты.

«Шетелдік ірі компанияның біздің өңірді таңдап, іс бастағалы жатқаны қуантады. Мен сіздердің зауыттарыңызбен танысып шықтым. Біз өз тарапымыздан қолдау танытамыз. Әр мәселе ескеріледі. Аяқсыз қалмайды деп сеніммен айта аламын. Жұмыстарыңызға сәттілік тілеймін», — деді облыс әкімі Ғауез Ғауез Нұрмұхамбетов.

Осылайша «Qyzyljar» арнайы экономикалық аймағы бір зауытпен толығады. Жоспар бойынша өндіріс ошағының құрылысы келер жылдың көктемінде басталып, 2025 жылы аяқталады. 50-ге тарта азамат жұмыспен қамтылады. Инвесторлар қазір жергілікті университет басшылығымен келіссөз жүргізуде. Олар мамандарды бүгіннен дайындамақ ниетте. Қоса кетейік, келешекте дайын өнім толығымен экспортталатын болады.