Көкшетаулық жүргізуші жолда көмек көрсеткен СҚО полицейлеріне алғыс білдірді
Көкшетаулық жүргізуші СҚО полицейлеріне жолда жедел көмек көрсеткені үшін алғыс білдірді, деп хабарлайды тілшіміз.
30 қараша күні Астана – Петропавл автожолының 363-шақырымында орналасқан Келлеровка ауылының маңында Солтүстік Қазақстан облысы полиция департаменті патрульдік полиция батальонының қызметкерлері Дмитрий Кравченко мен Арман Оралов Көкшетаудан Петропавлға темір құбыр тиеп бара жатқан ГАЗель автокөлігі жол жиегіне шығып қалғанын көреді. Жүргізуші көктайғақтың кесірінен тізгінге ие бола алмай, жол жиегіне шығып қалған. Тәртіп сақшылары тиісті мамандардан көмек сұрап, ауыр техниканы шақыртқан. Көп ұзамай автокөлік шығарылды. Полицейлер көлікті жолға шығару кезінде қозғалыс қауіпсіздігін қамтамасыз етіп, шашылған жүкті жинауға көмектесті.
Жүргізуші Сұлтанбек Ғазизов полиция қызметкерлері мен жол қызметінің қызметкерлеріне жедел көмек көрсеткені үшін шын жүректен алғысын білдірді. Зақымданған ГАЗель жөндеуден өту үшін Көкшетауға дейін тіркеуге алынды. Полицейлер жүргізушілерден қала сыртындағы жолдарда абай болуды, метеорологиялық болжамдарды назарға алуды және жолда жүру ережелері талаптарын қатаң сақтауды сұрайды.