СҚО полицейлері «Астық – 2023» іс-шарасын өткізіп жатыр
СҚО-да полицияның мобильді топтары егін жинау науқаны аясында ұрлықтың алдын алу бойынша рейдтер жүргізіп жатыр, — деп хабарлайды тілшіміз.
Солтүстік Қазақстан полицейлері «Астық – 2023» жедел алдын алу іс-шарасын жүргізуді жалғастырып жатыр. Аталған шара аясында түнгі рейдтер, дала жолдарындағы тексерулер, бейнекамераларды орнату қажеттілігін түсіндіру қолға алынған. Мобильді топтар егістіктер мен астық қоймаларын үнемі айналып өтіп, жаңа астық жинауға байланысты қылмыстардың алдын алуға баса назар аударады. 18 тамызда бастау алған «Астық– 2023» операциясының басты мақсаты – ауыл шаруашылығы өндірушілеріне жәрдем беру, жанар-жағармай материалдарын, гербицидтер мен қосалқы техника бөлшектерін ұрлаудың алдын алу мен ашуға бағытталған. Осы мақсатта облыстағы 13 ауданның әрқайсысында мобильді топтар құрылды. Олардың құрамында тәжірибелі жедел уәкілдер, учаскелік және патрульдік полицейлер бар.
Аталған іс-шара бастала салысымен Жамбыл ауданының аумағында ұрлық фактісі тіркелді. Ал қалған аудандарда әзір қылмыс тіркелген жоқ. СҚО ПД криминалдық полиция басқармасының ақпараты бойынша, жыл басынан бері осы желі бойынша 11 ұрлық тіркелген.
«Бұрын ашылған қылмыстар бойынша жедел-іздестіру іс-шараларының нәтижелері көбінесе кәсіпорын қызметкерлерінің өздері, маусымдық қылмыстарға қатысты болып жататындығын көрсетеді. Сондықтан да шаруа қожалықтары өз объектілеріне бейнебақылау камераларын орнатулары керек», — деді СҚО ПД ПКП бастығының міндетін атқарушы Мадияр Харипов.
«Астық – 2023» жедел алдын алу іс-шарасы өңірде 10 қазанға дейін жалғасатын болады.