СҚО Кәсіпкерлер палатасының директоры болып Есжан Оразалин тағайындалды

«Атамекен» ҚР Ұлттық Кәсіпкерлер палатасы Басқармасының шешімімен өңірлік кеңестің келісімі бойынша Солтүстік Қазақстан облысының кәсіпкерлер палатасының директоры болып Есжан Оразалин тағайындалды, деп хабарлайды тілшіміз.

Оразалин Есжан Қабиұлы 1970 жылы 7 қарашада Солтүстік Қазақстан облысы Сергеевка қаласында дүниеге келген. 1995 жылы Көкшетау ауыл шаруашылығы университетін «Ғалым агроном» мамандығы бойынша бітірген. 2006 жылы заңгер мамандығымен Манаш Қозыбаев атындағы Солтүстік Қазақстан мемлекеттік университетін тәмамдады.  

Еңбек жолын 1989 жылы бастаған. Әр жылдары МемжерҒӨО Солтүстік Қазақстан филиалында инженер-жерге орналастырушы, Солтүстік Қазақстан облыстық жер ресурстарын басқару комитетінің бас маманы болып жұмыс істеді.

2004 жылдан 2022 жылға дейін Есжан Оразалин Солтүстік Қазақстан облысының кәсіпорындарында басшылық қызметтерде болды.  Алғашқы үш жылда «Продкорпорация» АҚ филиалы директорының орынбасары болып жұмыс істеді, содан кейін бес жыл бойы осы кәсіпорынды басқарды, кейін – «Қазақстандық астық компаниясы» ЖШС өңірлік өкілдігін басқарды. Ал 2014 жылдан бастап 8 жыл бойы «Солтүстік «ӘКК»АҚ Басқарма төрағасы лауазымында еңбек етті.

СҚО Кәсіпкерлер палатасының Өңірлік кеңесі төрағасы Олег Иванов бастамасымен Есжан Оразалиннің кандидатурасын бірауыздан қолдап, Есжан Қабиұлына жаңа лауазымда табыс тілеп, өңірдегі кәсіпкерлік ортаның дамуына және бизнес-климаттың жақсаруына ықпал ететін басты міндеттерді белгіледі.

Солтүстік Қазақстан облысы Кәсіпкерлер палатасының басшысы қызметін атқарған Тимур Бекеев Алматы облысына ауысты.