Облыстың тұрақтандыру қорына 10,5 мың тонна азық-түлік сатып алынды
Өңірдің тұрақтандыру қорын «Солтүстік» ӘКК-сы қалыптастырады. Қорды әлеуметтік маңызды азық-түлікпен толтыру үшін облыстық бюджеттен қомақты қаржы бөлініп тұрады. Биыл тұрақтандыру қорына 10 жарым мың тоннадан астам азық-түлік сатып алынды, деп хабарлайды тілшіміз.
Сатып алыған тауардың 4 мың тоннасы – ұн, 326 тоннадан астамы – күріш, 370 тоннаға жуығы – қарақұмық, 820 мың литрден астамы – сұйық май, 400 тоннадан астамы – тұз. Сондай-ақ, 1,3 мың тоннаға жақын көлемде қант пен картоп салынған. Тағы жүздеген тонна көлемінде сәбіз, орамжапырақ, сарымсақ бен тауық еті де бар.
Барлығы – әлеуметтік маңызды болып саналатын 19 тауар түрінің 14-і қамтылған. Өнім негізінен жергілікті тауар өндірушілерден сатып алынады. Қоймалардағы азық-түлік тұрақтандыру қорының нүктелеріне күн сайын, супермаркеттерге – аптасына 3 рет, үй жанындағы дүкендерге
аптасына 2 рет жеткізіледі. Қормен ауылдық дүкендер де жұмыс істейді. Оған деген тапсырысты аудандық кәсіпкерлік бөлімдері қабылдайды. Сауда нүктелері мен азық-түліктің бағасын корпорацияның https://spk-soltustik.kz сайтынан көруге болады.
«Солтүстік» ӘКК-нің сауда нүктелеріндегі азық-түлік бағасы:
«Лидер» күрішінің бір келісі – 300 теңге
Қант – 460 теңге
«Ассоль» тұзы – 50 теңге
Өлшеніп берілетін «Егiн» рожкиі – 245 теңге
Қарақұмық – 330 теңге
«Заречное» сұйық майы – 650 теңге
Биылғы орамжапырақ пен сарымсақ – 95 және 110 теңге
Тауықтың сан еті – 950 теңге
1-ші категориялы жұмыртқаның ондығы – 350 теңге
«DEZ» 1-ші сұрыпты ұнының 2 келісі – 253 теңге